Medan mannen har vore flink ute har eg vore flink inne. Det skulle vise seg at sjølv med lite tolmod og kranglevoren symaskin skulle det gå ganske greit å lage ei enkel vimpelrekke av voksdukrester.
Klarer eg det, klarer du også. Det er kun tre enkle steg:
1) Lag deg ein mal med å brette eit A4 ark på midten og klipp ein diagonal. Bruk knappenåler til å feste malen på duken. Eg la min duk dobbel og klipte til. Då blir vimpelen lik på begge sider.
2) Fest langs kanten med knappenåler og sy. Hugs å lage ein løpegang øverst som du kan tre tau gjennom.
3) Ferdig vimpel. Heilt øvst ser du løpegangen. Bruk ein strikkepinne som du teiper fast tauet til og tre gjennom. Eg brukte hamptau frå Biltema og festa ein knute mellom kvar vimpel.
Hos oss gjer vimpelrekka seg godt langs med leveggen. Me har ikkje mindre enn tre slike veggar, og litt dekor på desse må vel vere lov? Det fine med voksduk er jo at dei kan henge ute heilt til eg blir lei!
Ideen til å lage vimplar av voksduk er nok ikkje min, men eg fekk det for meg då eg hadde handla min årlege duk på Kid og oppdaga at den var alt for lang. Eg lagde derfor malen min etter kor mykje eg kunne klippe av duken og fortsatt ha den på bordet!
--
I morgon startar ferien igjen for oss! Eg har nemleg hatt meg to veker med sommarjobb slik at eg kan ta ferie i lærarferien min. Ekstra godt å ta ferie igjen då :)
